Ефективни начини за наплата

Фирмите можат да ја забрзаат наплатата на своите парични побарувања и да избегнат проблеми со задоцнето плаќање со тоа што ќе развијат ефективен план за наплата. Во продолжение се дадени неколку чекори кои можеш да ги преземеш, за да се заштитиш од клиентите кои не плаќаат навреме.

Внимавај на изгледот на твоите фактури

Води сметка твоите фактури да изгледаат јасно, да бидат точни, детални и разбирливи. На секоја треба да стои јасно и сумата која треба да се плати; број на налогот за нарачка, името и адресата на купувачот; името на твојата фирма, адреса, и идентификацискиот број. Секако треба да го наведеш и името и телефонскиот број на лицето за контакт во твојата фирма ако се појават некои прашања. Ако е можно, наведи ги сите ставки за наплата по реден број. Потешко е да се спори за сметка која е расчленета по ставки, и ако се случи спор за плаќање на сметката, ќе можеш легитимно да побараш плаќање на неспорните ставки. Фактурите треба исто така да содржат и одредба со која се информира купувачот да те побара ако се појават какви било проблеми со твоите услуги. На фактурата треба јасно да се наведени задоцнетите побарувања.

Испраќај ги навреме твоите фактури

Што поскоро ги испратиш твоите фактури, тоа поскоро ќе пристигне исплатата. Некои мали фирми ги испраќаат своите фактури еднаш месечно, но тоа е погрешно, затоа што може да одложи некои исплати за две до три недели. Затоа, обиди се да ги испратиш фактурите во рок од ден, два по испораката на својот производ, или по завршување на проектот.

Испрати ја фактурата на вистинското лице

Ако ја испратиш фактурата на погрешно лице, ризикуваш задоцнето плаќање од 30 или 60 дена, затоа што фактура испратена на погрешно лице потоа кружи низ фирмата. Зборувај директно со својот клиент и прашај го до кого треба да ја адресираш фактурата. Ако фактурата треба да стигне до некој со кого не контактираш секојдневно, јави се и претстави се пред да ја испратиш сметката по пошта. 

Ако ја праќаш сметката до сметководителот на твојот клиент или до оддел за сметководство, адресирај го писмото и до него и потоа јави се по телефон.

Што понатаму

Лесно е сметководителот да ја занемари фактурата ако нема дополнителен потсетник, односно ако не се јавиш да го провериш статусот на фактурата. Краток повик може да ти потврди дека твојата фактура пристигнала и дека е во процес. Ако не добиеш уплата до одреден датум, провери со сметководителот повторно кога ќе биде фактурата платена, и јавувај се еднаш неделно, сe додека не пристигне  уплатата.